La Distec SA ha dumandà il chantun da pudair far durant 3 mais lavur curta. Sco quai ch'il directur Loris Marsura ha ditg envers Radiotelevisiun Svizra Rumantscha haja il chantun acceptà questa mesira. Il venderdi passà sajan ils collavuraturs vegnids infurmads. I possia tgunsch esser pussaivel che la lavur curta stoppia anc vegnir prolungada per ulteriurs 3 mais.
Lavur curta empè da relaschadas
Ch’ins introducescha lavur curta empè da relaschar persunal ha ina simpla raschun, ha declerà Loris Marsura. «Igl è grev da chattar persunal qualifitgà en ina regiun a l’ur e la glieud che nus avain scolà vulain nus tegnair tar nus, pertge cura che la situaziun sa megliurà duvrain nus la glieud».
Fin la fin da l'onn sa reducescha il dumber dals emploiads probablamain per 10.
Ch’i vegnia a dar ina reducziun da persunal na saja probabel betg d’evitar. Persunas che giajan na vegnian betg remplazzadas, uschia Loris Marsura. El quinta ch’il dumber dals emploiads sa reduceschia per rodund 10 fin la fin da l'onn.
Dasper la lavur curta vegn era guardà co ins po meglierar l’effizienza u reducir custs tar la producziun. A lunga vista vegnan intginas lavurs, nua ch’ins na po betg pli concurrenzar cun il pretsch, probabel laschadas producir en l’exteriur.
Optimists per l’avegnir
Per la segunda mesadad da l’onn è Loris Marsura dentant optimistic. Tranter auter pudess il producent d’aviuns Pilatus surdar tschertas lavurs a la firma. Ils sgols da test èn il matg e suenter vegn decidì sch’i dovra anc midadas vid las parts u sche la producziun po cumenzar. Ins saja era anc londervi da contractar cun nova clientella che pudess procurar per lavur ils proxims onns.
Distec occupa vinavant emprendists
La Distec SA dat actualmain lavur ad 83 persunas da quai èn 15 emprendists. La partiziun d’emprendists n’è betg pertutgada. Era 2015 vegnan novs emprendists a pudair cumenzar cun lur emprendissadi.
Survista dal chantun Grischun
Lavur curta n’è per il mument betg mo tema tar la Distec a Mustér. Tenor l’Uffizi d’industria, lavur e mastergn hajan 9 fatschentas la lubientscha da far lavur curta.
RR novitads 10:00