Siglir tar il cuntegn
cuntegn

Surselva Lavina a Trun ha destruì guaud da schurmetg

Il glindesdi a bun'ura ha ina lavina ch'è rutta ora en la regiun sut ils Cavistrai chaschunà donns vid il guaud.

La lavina da l'Alp da Schlans è vegnida fin 200 meters sur la via chantunala.
Legenda: La lavina da l'Alp da Schlans (sdrima amez) è vegnida fin 200 meters sur la via chantunala. RTR, G. Hosang

La lavina è stada eri var 200 meters sur la via da colliaziun tranter Trun e Schlans. Sco quai ch'il selvicultur da Trun, Mattias Cadruvi ha ditg ad RTR saja il 1984 la lavina da l'Alp da Schlans vegnida l'ultima giada uschè lunsch giuadora. Quai ch'ins po gia dir è che la lavina ha destruì ina part da guaud da protecziun ch'era creschì dapi lura. Vinavant haja la lavina era destruì guaud da protecziun pli vegl.

Propi nua che la lavina è ruta ora han ins anc betg vis. Medemamain ha l'aura era impedì da sgular e guardar sch'i ha dà donns vi da chamonas e clavads. Igl è previs da sgular oz per pudair giuditgar la situaziun.

Lavina ha fatg donns sin il pass da l’Alpsu

Era sin il pass da l’Alpsu è vegnì giuadora ina lavina tranter la galaria e la staziun dal tren. Sco quai che Jan Bärwalde da la Viafier Matterhorn Gottard ha ditg ad RTR haja quella chaschunà donns considerabels vid la lingia d’electricitad e signals da la viafier. Quai hajan ins gia pudì constatà sin fundament da purtrets dad ina camera installada sin il pass e da purtrets da manischunzs da maschinas da pista. Damai ch’i saja pervi dal grond privel da lavinas grev da vegnir en il lieu quintan ins da pudair sgular surora e guardar la situaziun. Cler èsi gia ussa tenor Jan Bärwalde ch’i n’è betg pussaivel a curta vista dad avrir la lingia sur il pass.

RR novitads 12:00