Siglir tar il cuntegn

Header

Sin in prà en plazzadas 3 figuras da lain. Quellas figuras furman il maletg per il gieu el liber.
Legenda: Tenor la preschentaziun dil project savess il maletg al lieu da gieu a Degen vesair ora uschè. MAD
cuntegn

Las Valerusas La Lumnezia elavura il gieu en il liber «Las Valerusas»

Ils custs per il spectacul, che duai vegnir producì il 2021, èn calculads cun 1,35 milliuns francs. Vi da quels vul la suprastanza communala pajar 200'000 francs.

En la Lumnezia han gieus en il liber ina gronda tradiziun. Adina puspè vegnan realisads tals gieus, nua che tut la populaziun da la vallada è integrada. L'ultim gieu en il liber è stà l'onn 2003 a Vella – lura cun il toc «La Passiun»

«Las Valerusas»

Il gieu planisà per l'onn 2021 tematisescha la guerra da Belmont l'onn 1352 e la rolla prominenta, che vegn attribuida a las dunnas lumnezianas da quella giada.

Uschia vegn quintà, ch'ils umens sajan stads a s.Carli sut il Mundaun en il cumbat cunter l'adversari – fertant che quel ha empruvà ina segunda attatga a Porclas. Ma l'inimi n'ha betg fatg quint cun las dunnas lumnezianas. A Porclas hajan «las valerusas» stgatschà l'adversari cun lavinas da crappa e laina bunamain en il stil dad ina segunda guerra da Morgarten.

Custs da 1,35 milliuns francs

La dimensiun, che la choreografia dal spectacul «Las Valerusas» ha la fin finala, n'è actualmain anc betg clera. Ils custs previs dad 1,35 milliuns francs èn bunamain il dubel da quels da l'ultim gieu en il liber. L'onn 2003 aveva la producziun da «La Passiun» anc custà 750'000 francs.

Als custs da «Las Valerusas» vul la suprastanza da la vischnanca Lumnezia sa participar cun ina contribuziun da 200'000 francs. Quella proposta sto vegnir approvada da la radunanza communala.

RR Total local 11:45