Siglir tar il cuntegn

Header

Navigaziun

cuntegn

Surselva Las pistas a Laax èn fatgas; Ma co èsi cun il privel?

Grazia a la naiv artifiziala hai avunda naiv per far pistas en il territori da skis da Flem-Laax-Falera. Dals 200 km pista che Laax ha èn dentant be 80 km preparads. Sper questas pistas da naiv artifiziala n'hai betg blera naiv. Ed i po vegnir stretg cun tantas persunas sin uschè paucas pistas.

Strusch in terz da las pistas a Laax èn avertas. Quai po vegnir stretg cun blers turists. Vitiers vegn anc che la naiv artifiziala ha in pau in'autra consistenza che la naiv natirala e dasper la pista n'èsi quasi nagina naiv.

Tut tenor relaziuns po quai esser malsegir. Gl'è er schon vegnì tar accidents quest onn pervi da las relaziuns malsegiras. I è perquai da far attenziun.

Mesiras per la segirezza en il territori da skis

Tenor Corsin Clopath, il responsabel per la segirezza sin las pistas, n'è la situaziun betg pli malsegira che durant onns cun blera naiv. Sch'ins sa tegnia vid las reglas na saja quai nagin problem. Sch'ins cupitgia dentant, lura dettia tut segund pli grevas blessuras. Surtut il chau saja periclità.

Ins emprovia gia enten bajegiar las pistas da far bain ellas. Mintgatant stoppian vegnir messas dapli saivs al ur per far la segira. Sur bots che sajan nunsurvesaivels na possian ins era normalmain betg ir memia spert surora damai ch'i pudess esser insatgi blessà da l'auter maun. Ins stoppia pudair tegnair eri entaifer il tschancun ch'ins vesia. Cun sa tegnair vid questas reglas e prender resguard in da l'auter duess la segirezza sin las pistas esser nagin problem.

RR actualitad 12:00