Siglir tar il cuntegn
Inhalt

Surselva Las pendicularas da Val èn salvadas – il mument

Il suveran da Val ha decidì da dar in emprest da CHF 800’000.- per cuvrir il deficit actual e garantir il manaschi l’onn proxim.

Legende: Video Co vinavant cun las pendicularas da Val s. Pieder? abspielen. Laufzeit 01:52 Minuten.
Or da Telesguard dals 22.04.2016.

A Val han radund 250 votantas e votants decidì ier saira senza cuntravuschs da dar a las pendicularas da Val in emprest da CHF 800'000.- per cuvrir tut ils custs ed uschia salvar las pendicularas dal concurs. Cun quai emprest èn segiradas la stagiun da stad 2016 e las preparativas per la stagiun d'enviern 2016/17.

En 5 onns cifras nairas

Il pli tard en 5 onns vulan las pendicularas puspè scriver cifras nairas. Quai grazia a projects d’investiziun dal biro da viadis englais Powder Byrne e dal biro d'architectura Domenig da Cuira. Tenor il president communal Stefan Schmid pretenda la vischnanca da las pendicularas da Val, ch’i vegnia reducì ils custs uschè fitg sco pussaivel enfin che quels projects èn realisads. La vischnanca na saja betg pronta da dar mintg’onn ina tala summa.

Amortisaziuns sistidas

Ord quai motiv han las pendicularas sistì las amortisaziuns e decidì che mo las lavurs da mantegniment absolutamain necessarias vegnan exequidas. Vinavant han ils responsabels era calculà quants daners ch'i savessan spargnar cun reducir la purschida sin in minimum ni schizunt cun avrir las pendicularas mo la stad ni mo l'enviern. Cun quellas variantas possia dentant vegnir spargnà el meglier cas be CHF 100'000.- ad onn. Il grond donn dal renum e la sperdita da giasts na giustifitgass perquai betg da realisar ina da quellas variantas. Enfin la proxima radunanza generala vulan las pendicularas perquai preschentar novas variantas co spargnar daners.