Las finamiras da Glion sco citad europeica da refurmaziun

La Cuminanza da baselgias evangelicas en Europa ha surdà il label da «Citad europeica da refurmaziun». Cun quai label vul Glion cunzunt promover il turissem.

Il label da “Citad europeica da refurmaziun” è vegnì surdà uffizialmain en la baselgia refurmada da Glion.

Legenda da maletgs: Il label da “Citad europeica da refurmaziun” è vegnì surdà uffizialmain en la baselgia refurmada da Glion. ANR

Davent da l’onn 2017 enfin la fin 2019 vegn festivà en pliras terras da l'Europa 500 onns refurmaziun. En quai connex surdat la Cuminanza da baselgias evangelicas en Europa (CBEE) a citads impurtantas per la refurmaziun il label da «Citad europeica da la refurmaziun». Il mars 2015 ha la citad da Glion obtegnì quest label. Uss è el vegnì surdà uffizialmain als represchentants da la citad da Glion.

Il document uffizial da la CBEE, che attesta a la citad da Glion il label sco “Citad europeica da la refurmaziun”.

Legenda da maletgs: Il document uffizial da la CBEE, che attesta a la citad da Glion il label sco “Citad europeica da la refurmaziun”. RTR, C. Albin

Dapli turissem

Il label «Citad europeica da la refurmaziun» duai gidar a far pli enconuschenta la citad da Glion, e quai en l’entir mund. Per quest motiv è vegnida creada ina gruppa da project cun represchentants da la baselgia refurmada, da la vischnanca da Glion, da l’organisaziun da turissem sco era d’auters partenaris locals. Tenor il manader dal project, il plevon da Castrisch/Riein/Sevgein Jan-Andrea Bernhard, è la gronda finamira da carmalar dapli turists a Glion. Quai cun organisar differentas occurrenzas e purschidas cun il tema 500 onns refurmaziun.

Guids culturals, congress e dietas

Planisads èn tranter auter il settember 2017 in congress scientific internaziunal pertutgant ils artitgels da Glion e l’onn 2018 in festival cultural che tracta il tema da 500 onns refurmaziun. Dasperas èn anc planisads guids tematics atras la citad da Glion, scuntradas cun il tema Glion sco citad da refurmaziun en il passà e preschent e differentas festivitads cun partenaris regiunals.

Applicaziun per telefonins

Ina purschida speziala è ina applicaziun per telefonins cun infurmaziuns sur da tut las citads europeicas da refurmaziun, pia in guid electronic. Cun l’agid da quella app pon turists visitar tut ils lieus impurtants en quellas citads da refurmaziun e survegnan era anc infurmaziuns pertutgant quels lieus. Tenor Jan-Andrea Bernhard è gia decidì da translatar las infurmaziuns da Glion sper tudestg, talian ed englais era per rumantsch Sursilvan.

Ils represchentants da la citad da Glion Jan-Andrea Bernhard (mainaproject) ed Aurelio Casanova (pres. comm.) cun Mario Fischer da la CBEE. (da san.)

Legenda da maletgs: Ils represchentants da Glion Jan-Andrea Bernhard ed Aurelio Casanova cun Mario Fischer da la CBEE. (da san.) ANR

Circa 200’000 francs

Per organisar e coordinar tut quellas occurrenzas e purschidas ha la gruppa a disposiziun radund CHF 200’000.-. Sco quai che Jan-Andrea Bernhard ha ditg a RTR, vegnia la gronda part dal preventiv da la Baselgia evangelic-refurmada dal Grischun. Dasperas sa participeschian era la plaiv e la vischnanca da Glion vi dals custs. Era cun quel preventiv saja el però avisà sin l'agid da persunas che fetschian lavur voluntara.