La finamira numer in è clera – proteger las atletas ed ils atlets. Dasper respectar las reglas chantunalas han ils organisaturs dal «Laax Open» era da resguardar las reglas che la FIS ha ordinà. Per exempel d’empruvar da tegnair las snowboardistas ed ils snowboardists en ina uschè numnada «bubble». Tenor il manader da l’event, Donald Nader, munta quai concret d'isolar ils sportists dals aspectaturs e giasts.
Senza in test negativ na va nagut
Sco emprim sto mintga atleta e mintga atlet mussar in test da corona negativ. Lura survegnan els il pass persunalisà per la zona cotschna, ch'è per exempel il start. Là na dastga entrar nagin auter ch'anc ils trenaders. Gidantras, schurnalists ed autras persunas che lavuran tar l’event ston avair 3G e survegnan in pass persunalisà grisch. Las colurs gidan per coordinar.
Dapli persunal malgrà ch'i na dat nagin festival
En tut han radund 850 persunas in pass, da quai radund 300 in pass cotschen: Pia las atletas ed ils trenaders, e singulas persunas che filmeschan per exempel l'event. Pervia da las mesiras da corona dovra Donald Nader enturn 50 persunas dapli che gidan.
Il sforz cun las mesiras da corona è circa tuttina grond, sco uschiglio d’organisar il festival cun ils concerts al Laax Open.
Decider mesiras per aspectaturas ed aspectaturs
Ina sfida è da decider tge mesiras che valan per las aspectaturas ed ils aspectaturs. Donald Nader e ses team hajan pudì emprender da la cursa da skis ad Adelboden. Là avevan ils fans bain 3G, dentant nagina distanza e naginas mascrinas. Quai duai esser auter al «Laax Open». Là ston las aspectaturas ed ils aspectaturs malgrà 3G purtar ina mascrina.
