Siglir tar il cuntegn

Surselva Laax è il meglier dal mund per freestylists

Als World Ski Awards 2017 a Kitzbühl è il territori da skis da Laax vegnì elegì per la segunda giada sco meglier resort dal mund per freestyle.

Laax è puspè il meglier territori da skis per freestyle.
Legenda: Laax è puspè il meglier territori da skis per freestyle. LAAX

Als World Ski Awards 2017 a Kitzbühl è il territori da skis da Laax vegnì elegì sco meglier resort dal mund per freestyle. Plinavant ha Laax era survegnì il premi sco meglier territori da skis da la Svizra ed era il rocksresort, il resort da vacanzas cun hotels, restaurants, bars e stizuns a Laax Murschetg, ha gudagnà en la nova categoria «meglier hotel da skis verd dal mund».

La victoria da Laax en la categoria freestyle è gia la segunda victoria en quella categoria suenter l'emprim plaz l'onn passà. Era il titel da meglier territori da skis svizzer ha Laax gudagnà uss 5 giadas en seria.

Loschs èn ils responsabels era, ch'il rocksresort ha gudagnà en la nova categoria per hotels da skis ecologics. Tenor Flavio Battaini da l'Arena Alva mussa quai, che la destinaziun saja sin la dretga via cun ir enturn responsabel cun las resursas natiralas. Gia mo ch'i dat quella nova categoria saja in segn, con impurtants che quai tema saja era per in territori da skis.

Ils victurs dals «World Ski Awards 2017» vegnan elegids d'ina giuria d'experts ed en ina votaziun publica.

RR novitads 12:00