Siglir tar il cuntegn

Surselva La tur da Stoffel ina sfida per ils pumpiers

Sco bajetg è la tur da 381 meters autezza ina sfida per ils pumpiers. Il directur da l'Assicuranza d'edifizis dal Grischun, Marcus Fletscher ha ditg, ch'ils plans da la tur sa chattian tar els sin maisa.

Markus Feltscher il directur da la segirada da bajetgs avant ina fotografia da la tur gigantica da Val
Legenda: Markus Feltscher il directur da l'Assicuranza d'edifizis dal Grischun discurra da la tur da Val RTR, L. Livers

In bajetg nov sco la tur da Val s. Pieder planisada sto en emprima lingia vegnir construida segir. Quai pon ins far cun planisar endretg. Surtut vegnan ils experts per la segirtad involvids gia a partir da l’entschatta.

Ord vista dals pumpiers è la problematica gronda d'ina tala chasa auta sco quella planisada a Val, ch'ins na po betg salvar la glieud cun stgalas. Perquai vegn pretendì ascensurs mo per ils pumpiers e la tur sto vegnir partida en parts nua ch’il fieu na po betg sa derasar vinavant.
Ils plans èn, sco Markus Fletscher ha ditg, gia tuts avant maun. Els duain vegnir examinads.

Pumpiers vegnan a stuair sa fatschentar cun la tur

Purtret da Hans Ueli Roth igl inspectur da pumpiers Grischuns
Legenda: Era Hans Ueli Roth è gia s'occupà cun la tur da Remo Stoffel RTR, L. Livers

Per l'inspectur da pumpiers dal Grischun Hans Ueli Roth èsi cler ch'ina giada che la decisiun da bajegiar la tur è fatga, vegnian ils pumpiers da Val a stuair s’occupar pli intensiv cun chasas autas. I na saja dentant insumma betg ina chaussa nunpussaivla da dumagnar questa sfida, manegia Roth. Ils emprims discurs cun ils pumpiers da Val han gia gì lieu. Quai attestescha Renato Lutz il chapitani da pumpiers da Val.