Siglir tar il cuntegn

Header

Navigaziun

La Therme da Val construida ord platta da crappa.
Legenda: La Therme da Val è dapi 1998 sut protecziun da monuments dal chantun Grischun. RTR, Linus Livers
cuntegn

Surselva La Therme da Peter Zumthor per 1 franc

La Therme da Val duai vegnir transfurmada en ina fundaziun «Felsentherme Vals». Per quest intent po la vischnanca cumprar enavos la Therme da la 7132 SA.

L' onn 1996 è il bogn termal da l'architect Peter Zumthor vegnì inaugurà. La vischnanca ha investì 25 milliuns francs en quest bogn. Gia l'onn 2009 aveva la vischnanca cumenzà cun la tschertga d'in investider. L'entir cumplex da l'hotel termal duvrava ina renovaziun. La vischnanca n'ha dentant betg vulì s’engaschar pli fitg en l'hotellaria.

Stoffel ha pajà 7,7 milliuns francs per la Therme

L'onn 2012 ha la vischnanca da Val Son Pieder vendì l'hotel cun bogn termal per 7,7 milliuns a Remo Stoffel e sia 7132 SA. En il contract da vendita stat dentant ch'il bogn termal possia vegnir transferì en ina fundaziun. Quai sto succeder fin la fin da mars 2017.

La fundaziun è ina segirtad per la vischnanca.
Autur: Stefan SchmidPresident da vischnanca da Val Son Pieder

Sch'i vegniss ina giada ad in concurs da l'hotel 7132, lura na vegniss la Therme betg sut il martè. La fundaziun sco possessura pudess manar vinavant il bogn ed uschia sminuir il donn per la populaziun da Val.

Il contract da servitut che la fundaziun fa ussa cun l'administratur cumpiglia, che la 7132 SA po sco suletta far diever da quest object, ma ella è era responsabla per tut ils custs da mantegniment e per las investiziuns.

Giasts ed indigens pon vinvant far diever dal bogn

La fundaziun garantescha dentant che indigens e giasts d'auters hotels ed abitaziuns a Val pon far diever dal bogn per in pretsch reducì. Actualmain munta il pretsch a 20 francs per indigens e 45 francs per giasts, persunas d’ordaifer pajan 80 francs.

La proxima radunanza communala dals 24 da mars decida, sche la Therme vegn puspè enavos en ils mauns dals convischins da Val Son Pieder, e quai per il pretsch simbolic dad 1 franc.

RR actualitad 12:00