Siglir tar il cuntegn

Header

cuntegn

Surselva La stalla digitalisada da Wendelin Casutt

Sco en auters secturs ha la digitalisaziun era midà la vita dals purs. Pavlar, mulscher e far or d'uigl po ozendi tut vegnir fatg cun agid da computers.

audio
Saira: Digitalisaziun en ina stalla a Falera
ord Actualitad dals 21.11.2017.
laschar ir. Durada: 9 minutas 11 Secundas.

Dapi la stad 2015 posseda il pur Wendelin Casutt da Falera in roboter per mulscher sias 45 vatgas. Grazia a quel pon las vatgas decider sezzas cu ellas vulan vegnir mulschidas tut automatic dal roboter, ed ellas san far quai 24 uras per di. Quai dat al pur la libertad da parter en auter ses di da lavur. El na sto betg pli sco pli baud, esser da las 4 la damaun en stalla per mulscher l'emprima giada las vatgas.

Controlla totala

Il roboter n'è dentant betg mo in roboter che sa mulscher e che controllescha la qualitad dal latg (el mesira schizunt aunc la quantitad latg da mintga tettel). Durant che la vatga vegn mulschida vegn gist era mesirà la temperatura. Uschia sa il computer cura ch'igl è temp per ir per il taur. Plinavant registrescha il computer era con che mintga vatga ha maglià da tge pavel e schizunt con ditg che mintga vatga remaglia. Cu in da quels parameters na correspunda betg a la norma, survegn Wendelin Casutt in alarm sin ses telefonin ed el sa uschia reagir.

video
Digitalisaziun 3 – Co il mintgadi d’in pur e d’in mecanist sa mida
Or da Telesguard dals 20.11.2017.
laschar ir. Durada: 4 minutas 25 Secundas.

Las vatgas han bugen il roboter

Las vatgas sezzas na han tenor Wendelin Casutt betg problems da vegnir mulschidas d'in roboter e betg d'ina persuna. Cunquai ch'ellas possian decider sezzas cura ch'ellas vegnian mulschidas, sajan las vatgas bler pli calmas. Forsa saja quai era perquai ch'in roboter haja betg lunas e fetschia sia lavur adina tuttina. Quai sentian las vatgas, manegia Wendelin Casutt. En mintga cas saja i bler pli ruassaivel en stalla dapi ch'el lavuria cun in roboter.

RR actualitad 17:20

Artitgels legids il pli savens