La seria-web «METTA DA FEIN» - Sin il set da film a Vrin

En in vitget en la Surselva vegnan chattads regularmain animals cun chommas tagliadas giu. La pitschna cuminanza è tementada. Entant che plirs abitants crain vi d’in mitus, emprova il policist da sclerir il cas, quai però senza success. Ils mazzaments s'augmentan sco er la disfidanza dals abitants dal vitg. La seria da mazzaments finescha cun ina catastrofa a la festa dal vitg.

Oz consumescha in giuven public streams da Netflix, Disney+, Spotify & co. RTR è cun l’emprima seria ficziunala rumantscha perquai al puls dal temp ed al puls da noss public. La seria «Metta da fein» pon ins guardar sin rtr.ch, pia sin noss player RTR Play. Medemamein vegn ella publitgada sin nossas raits socialas sco Facebook, Instagram e Youtube.