Per l'onn passà ha la vischnanca da Laax savì communitgar in gudogn net da 75'000 francs, e quai suenter amortisaziuns da bunamain 4,5 milliuns francs. La basa da quai bun resultat è per part era il dumber d'abitants, ch'è creschì ils davos 17 onns per bunamain 50%. Laax ha uss 1'999 abitants. Ina consequenza da quest svilup è dentant, che la vischnanca sto engrondir la scola per avair avunda plaz per tut las scolaras ed ils scolars.
Dus novs bajetgs
La schliaziun che la vischnanca ha per engrondir la scola è da bajegiar 2 novs edifizis sin il tetg da la garascha sutterrana che vegn bajegiada questa stad gist sper la chasa da scola existenta. Quella garascha sutterrana vegn realisada en connex cun la renovaziun dal bogn cuvert resp. cun il nov albiert per giuventetgna ed è tenor il president communal Franz Gschwend. La garascha è concepida uschia, ch'igl è pussaivel da construir bajetgs sin il tetg da quella.
Tenor las prognosas tanschessan bajetgs d'ina auzada, per avair in pau reserva, vegn dentant planisà 2 fin 3 auzadas. Quella reserva dovri sch'il dumber d'uffants crescha pli fitg che spetgà. Dentant era co ei va vinavant cun las scolaras ed ils scolars da Schluein, Sagogn e Falera saja da resguardar. Ils contracts da cooperaziun cun quellas trais vischnancas van il proxim onn a fin e ston vegnir renovads. Cun Falera cooperescha Laax tar la scolina, la scola primara e la scola superiura. Qua quinta Franz Gschwend cun naginas midadas. Da Schluein e Sagogn van mo ils uffants da la scola superiura a Laax, ed era tar quellas cooperaziuns fiss ina midada ina surpraisa per il president communal da Laax.
RR actualitad 07:00