Siglir tar il cuntegn

Header

video
Runda da discussiun per il presidi da Ilanz/Glion
Or da Actualitad video dals 05.08.2022.
laschar ir. Durada: 43 minutas 42 Secundas.
cuntegn

La runda da discussiun Trais umens vulan daventar president communal da Ilanz/Glion

La vischnanca da Glion sto tscherner in nov presidi communal. Quai suenter che la presidenta actuala Carmelia Maissen, ch’è vegnida elegida en la regenza grischuna, ha abditgà il post sin la fin d’october.

Trais umens vulan surprender il post

Enfin ussa han Marcus Beer, Silvio Dietrich e Claudio Quinter annunzià lur candidaturas per il presidi communal. Ulteriuras persunas han la pussaivladad da far quai enfin il di d’elecziun dals 21 d’avust .

Marcus Beer

Avrir la box Serrar la box
Marcus Beer
  • 61 onns
  • è creschì si a Breil ed ha fatg il gimnasi a Mustér
  • ha studegià giurisprudenza a l'Universitad da Friburg
  • è stà prorectur da la scola mercantila a Glion
  • è dapi il 1991 scolast per roms economics en il Center da furmaziun Surselva a Glion
  • ha manà 11 onns la scola media spezialisada e commerziala sco er la scola mercantila en il Center da furmaziun Surselva a Glion
  • è candidat independent

Silvio Dietrich

Avrir la box Serrar la box
Silvio Dietrich
  • 55 onns
  • è creschì si a Breil
  • ha dà scola a Pitasch, Breil e Glion
  • è mainascola principal e commember da la direcziun da la vischnanca dapi la fusiun
  • ha sia atgna fatschenta da cussegliaziun per tut las gruppas en mira da la scola
  • è da nov deputà dal Cussegl grond
  • va per la Partida socialdemocratica en la cursa

Claudio Quinter

Avrir la box Serrar la box
Claudio Quinter
  • 53 onns
  • è creschì si a Glion
  • è interprendider e maina in'interpresa d'immobiglias
  • è commember dal parlament da la vischnanca da Glion ed è stà dus onns president dal parlament
  • president da l'Associaziun dals proprietaris da chasas Surselva
  • va per l'Allianza dal Center en la cursa

RTR ha discurrì cun ils candidats davart lur motivaziun da vulair daventar president communal e davart temas actuals che fatschentan la vischnanca il mument.

Uffizi da construcziun

Las grondas discussiuns ha chaschunà ils ultims onns l'uffizi da constucziun. Pervia da malcuntentientscha è vegnida inoltrada il november 2021 ina petiziun che pretenda da prender sut la marella l'uffizi.

Insatge n’ha betg funcziunà endretg. Uschiglio n’avessi betg duvrà ina petiziun. Quai ston ins dir.
Autur: Claudio Quinter
L’iniziativa pretenda da reorganisar l’organisaziun da la cumissiun da construcziun cun eleger persunas ord la populaziun per quest post. I fa senn da ponderar ina restructuraziun.
Autur: Silvio Dietrich
Cura ch’i va per l’estetica sun jau da l'opiniun ch’igl è problematic sch’ins avess d'intervegnir sco president communal. Quai na faschess jau segir betg.
Autur: Marcus Beer

Parlament ubain radunanza communala?

Questa primavaira è vegnida inoltrada in'iniziativa cun la pretensiun da reveder la constituziun communala. Quella pretenda da ponderar da schliar il parlament e persuenter introducir la radunanza communala. Era il sistem da direcziun duai vegnir reponderà – in tema che divida ils candidats.

I saja bel ch'i dettia da quellas petiziuns ed iniziativas, di Silvio Dietrich. Quai sajan exact ils instruments che la populaziun haja per reagir, sch'ella n'è betg cuntenta cun lavur dal president u da la suprastanza. Sco Dietrich declera vinavant, pudess el dentant er viver cun ina radunanza communala. Claudio Quinter è cleramain per il parlament. Quel saja ina projecziun da las fracziuns. Ma sch'il dumber da commembers dal parlament saja lura 25, 20 u 18, saja la finala tuttina. Marcus Beer vesa pli critic la direcziun. Quella saja problematica. La legitimaziun dal suveran haja en sasez la suprastanza communala sco executiva. Cun la direcziun survegnian emploiads dentant grondas cumpetenzas.

Elecziun ils 21 d'avust

Avrir la box Serrar la box

En l’emprim scrutini dovri il pli absolut per vegnir elegì. Per cas che nagin dals candidats cuntanscha quel, è il termin per il segund scrutini ils 25 da settember 2022.

RTR actualitad 11:00

Artitgels legids il pli savens

Scrollar a sanestra Scrollar a dretga