Siglir tar il cuntegn
cuntegn

Surselva La relevanza dal Hotel Waldhaus per il turissem vegn discutada

L'Hotel Waldhaus a Flem è in hotel ch'è relevant per il sistem turistic da Flem, u betg? Quella pretensiun è ussa sin maisa.

Il hotel Waldhaus a Flem è in hotel a la moda veglia cun grondas fanestras, la fatschada è mellen rosa.
Legenda: L'Hotel Waldhaus è impurtant per il turissem, surtut per la sparta congress. RTR, L. Livers

L'Hotel Waldhaus sez cumbatta cun problems finanzials e quai dapi ch'el na po betg pli vender segundas abitaziuns. La vischnanca da Flem è era acziunaria tar l'Hotel Waldhaus, ma quai na muntia betg automaticamain che la vischnanca sustegnia l'hotel finanzialmain, ha Adrian Steiger, il president communal da Flem ditg.

Waldhaus porscha lieu per conferenzas

Adrian Steiger definescha il Waldhaus cler e bain sco relevant per il sistem turistic. Senza il Waldhaus n'avessi betg dà la sessiun dal parlament federal en Surselva, e senza l'Hotel Waldhaus na dessi betg congress da gronda dimensiun. A Flem e conturn possian tut ils hotels profitar da las activitads che l'Hotel Waldhaus porscha en connex cun l'organisaziun da congress e conferenzas.

Er l’Arena Alva e differentas pendicularas hajan in’impurtanza per il sistem turistic da la regiun, precisescha Adrian Steiger. E sco hotel na dastgian ins er betg emblidar il Hotel Therme a Val S. Pieder.