Siglir tar il cuntegn
Inhalt

Surselva La regiun Surselva/Gottard duai vegnir il «mekka dad e-bikes»

Pliras staziuns da chargiar e-bikes en la regiun da Surselva/Gotthard duai pussibilitar a velocipedists che n’èn betg uschè endisads da far turas pli grondas. Uschia datti staziuns da chargiar l’accu dal velo en Surselva, en la regiun da la Val Blegn e da la Leventina ed en Val d’Ursera.

Ils velos da muntogna electrics èn sa sviluppads ils ultims onns fitg svelt.
Legenda: Ils velos da muntogna electrics èn sa sviluppads ils ultims onns fitg svelt. Keystone

L’idea è naschida da Marc Woodtli, il responsabel per il turissem en la regiun da Flem-Laax-Falera. Alura ha la regiun Surselva (Urs Giezendanner) surpiglià l’idea e la finala ha il directur da las pendicularas da Mustér Rudolf Büchi per la regiun sisum la Surselva/Gotthard realisar l’idea.

Durant la pausa da mezdi – gist chargiar la battaria dal velo

Las staziuns da chargiar l’accu per il velo da muntogna electric èn installadas damanaivel dad restaurants, hotels ubain attracziuns sco museums. Durant che l’accu vegn chargià (quai cuzza ca. 1½ fin 2 uras) po il giast star a gentar ubain giudair in’attracziun turistica. Il giast survegn alura da l’ustier etc. il cabel cun l’adapter adattà a ses velo.

Finamira è rait cun turas multifaras

Tenor Büchi n`èsi anc betg decidi, quantas staziuns da chargiar ch’i dettia. Il project saja «averts», uschia che privatas, vischnancas ubain organisaziuns turisticas pon era far part da quel.
La finamira saja d’avair ina rait cun turas multifaras, ha ditg Büchi. Cun in accu chargià pon ins alura cuntanscher almain duas proximas staziuns.

RR actualitad 07:00