Siglir tar il cuntegn
Inhalt

Surselva La regenza grischuna di na ad ina deponia nova a Trun/Zignau

Dacurt ha la regiun Surselva actualisà il plan directiv. En quest connex e cun la dumonda d'utilisar il spazi, propona ella tranter auter da far ina nova deponia per rimnar e zavrar rument da bajegiar a Trun/Zignau. Mo la regenza grischuna ha refusà questa proposta.

Rabius cun la zona da Marias.
Legenda: Rabius cun la zona da Marias. RTR, H. Giger

In argument è, che la zona da rimnar e zavrar rument Marias en la vischnanca da Sumvitg vegn engrondida. L’auter argument è, che l’Uffizi chantunal per natira ed ambient di ch’il lieu a Trun/Zignau na saja betg adattà. Quest lieu fiss memia damanaivel da l’aua, el è en ina zona da privel e là duess quai dar in program da revitalisaziun.

La regiun Surselva cuntenta cun Marias

Urs Giezendanner da la regiun Surselva di, ch’els hajan evaluà la plazza Marias, e quai saja in buna plazza da deponer e zavrar material da bajegiar. Ultra da quai na saja uschè lunsch da transportar material da Trun a Sumvitg.

Trun spetga anc sin decisiun a scrit

Il president communal da Trun Dumeni Tomaschett è surstà, che sia vischnanca n’haja anc betg survegnì ils arguments a scrit. El deplorescha dentant la decisiun da la regenza, perquai ch’ina deponia nova a Trun/Zignau avess purtà plazs da lavur. Ed ultra da quai saja quest terren vegnì duvrà onns en ed onns ora per deponer material, ed ina fatschenta da far catram saja stada sin quest areal.