Siglir tar il cuntegn
cuntegn

Surselva La quaglia sa senta bain en il Grischun

La populaziun da la quaglia crescha levet dapi ch’ins emprova da salvar il spazi da viver da l’utschè.

Quaglia (Wachtelkönnig)
Legenda: En Svizra datti fitg paucas quaglia (Wachtelkönnig). ASPU/BirdLife Svizra

Quest onn è vegnì annunzià 44 quaglias (sursilvan; curvenisch, tudestg; Wachtelkönnig) a l’Associaziun svizra per la protecziun dals utschels BirdLife. Da questas vivan 29 en il Grischun.

In da quests utschels ha il guardia-chatscha Ueli Jörimann pudì annunziar. I saja l’emprima quaglia ch’el haja udì en ses territori che cumpiglia las vischnancas da Trun e Breil. Sco quai che Ueli Jörimann ha ditg, n’haja el betg vesì l’utschè, el haja sulet udì ses tipic clom ch’è fitg dad aut e cuzza entiras notgs.

Populaziun da quaglias crescha levet

L’utschè fa igniv en il prà e sa mova per il pli mo giun plaun, quai ch’è era il privel per la quaglia. L’utschè è prest vegnì extirpà fin ils onns novanta perquai ch’ils prads vegnan cultivads adina pli intensiv.

Dapi lura emprova l’Associaziun svizra per la protecziun dals utschels BirdLife da mantegnair il spazi da viver dals utschels, ha ditg Raffael Ayé ad RTR. Quai cun empruvar da persvader ils purs da na betg segar ils prads enfin enturn mez avust ed uschia dar temps a l’utschè da cuar ora ils ovs e laschar vegnir gronds ils pulschains fin ch’i pon sez sgular. Ils purs che fan quai survegnan in'indemnisaziun dal chantun.

Il project da protecziun da BirdLife che dura gia passa 20 onns ha mussà success. Sco quai che Raffael Ayé di, creschia la populaziun da quaglias levet en Svizra.