Siglir tar il cuntegn
Inhalt

Surselva La malsogna da biestga «Pink eye» è derasada en Surselva

En 30% da las alps datti animals infectads.

Ina vatga ch'ha la malsogna «Pink eye».
Legenda: Ina vatga ch'ha la malsogna «Pink eye». RTR, Linus Livers

Questa stad hai dà en Surselva sin differentas alps da muaglia plirs cas da la malsogna «Pink eye». Tenor il veterinari da Glion Vitus Gartmann è «Pink eye» ina inflammaziun dals egls chaschunada d’ina bacteria.

Senza tractament sa l’animal daventar tschorvs, tar la malsogna na sa tractia dentant betg da la tschorvadad da chamutschs. Derasada vegn la malsogna cunzunt entras mustgas. Mesiras spezialas per proteger las muntaneras si d’alp n’han dentant betg stuì vegnir prendidas. Ils animals pertutgads èn vegnids stgargiads e tractads en stalla.

Duas vadellas avant stalla.
Legenda: Tar els dus è la malsogna gia passada. En paucs dis pon els turnar si d'alp. RTR, Linus Livers

La malsogna è fitg contagiusa ed è da chattar sin l’entir mund. Cunzunt periclitads èn animals pli giuvens. La malsogna sa mussa en emprima lingia cun avair ils animals sin pastgira. Sch’il tractament succeda baud avunda, restan ils donns dentant minims.

RR actualitad 17:00

La bacteria

La bacteria Moraxella bovis chaschuna tar arments la malsogna "Pink eye", in’inflammaziun contagiusa da l’egl. Ils emprims sintoms èn flussiun da larmas, in’inflammada da la congiuntiva e gramflis dal viertgel da l’egl. Pli tard pon sa sviluppar blessuras da la pel dira.

La bacteria sa derasa sur contacts directs tranter arments u tras mustgas.