Durant ils 3 dis avant la catastrofa aveva i dà 1 meter naiv en il fund da la Val S. Pieder. Pliras lavinas eran gia vegnidas giu. Tranter auter era lavinas ch'eran dapi decennis betg pli vegnidas. La situaziun era critica ed il privel per la part dal vitg tranter il bogn da Val e la punt en il vitg da Val, da vart sanestra dal Rain da Val, era enconuschents. Perquai aveva il president communal cusseglià d’evacuar intginas chasas en la zona da privel. Che quai n’era dentant betg succedì, ha el intervegnì la sonda saira cura ch’el è sa scuntrà cun autras persunas da Val en il restaurant Alpenrose.
20 da schaner a las 21:59
Ils convischins eran sa radunads en il restaurant Alpenrose per discutar sur da la situaziun actuala e per tadlar las novas prognosas da l’aura. Las 21:59 han els tuttenina udì in ramplunar e sfratgar e curt suenter silenzi e stgiradetgna. La lavina era vegnida ed aveva destruì 11 chasas, 4 stallas ed 1 garascha. Sin sia via enfin Val ha ella destruì 8 stallas, lingias d’electricitad e las lingias da telefon. Immediat èn ils umens da Val vegnids alarmads cun tutgar ils zains da la baselgia e la tschertga suenter survivents ha cumenzà. Senza glisch e da navaglia ina lavur difficultusa e privlusa.
5 umens nunmaridads per alarmar squadra da salvament
Cunquai che las lingias da telefon eran destruidas, ha ina gruppa da 5 umens nunmaridads stuì sa render da Val ad Uors per alarmar squadras da salvament e medis. In viadi stentus da 11 km a pe atras 1 meter naiv frestga e cun il privel da novas lavinas. Da las 3:30 è la gruppa finalmain arrivada ad Uors ed ha pudì dar alarm.
19 victimas
Da las 30 persunas ch'èn vegnidas en la lavina, n’han 19 betg survivì la disgrazia. 2 persunas han survivì cun blessuras e 9 èn vegnidas salvadas senza feridas. Plinavant èn crappadas 12 vatgas e 13 chauras. Era ha la lavina destruì u donnegià 11 chasas, 12 stallas ed 1 garascha. La lavina da Val è stada la pli gronda disgrazia en l'onn da lavinas 1951.
