Siglir tar il cuntegn
cuntegn

Surselva «La Guila» da Glion è spustada

La pitga da crap stat da nov en la rundella Runcaleida che sparta las vias en direcziun Sursaissa, Val e Lumnezia.

«La Guila» è posiziunada, uss sto ella anc vegnir betunada.
Legenda: «La Guila» è posiziunada, uss sto ella anc vegnir betunada. RTR, Carlo Albin

La pitga da crap «La Guila», in bloc da granit che la chava da crappa Truffer SA a Val aveva regalà il december 2012 a la citad da Glion, stat da nov en la rundella Runcaleida, la nova rundella sur Glion che sparta la via en direcziun Sursaissa, Lumnezia e Val. Pervia dal nov sviament da Glion ha la rundella stuì vegnir messa en in auter lieu ed perquai aveva il parlament da Glion decidì il matg 2016 da plazzar la pitga en la nova rundella Runcaleida.

Il bloc en furma d’in obelisc è ca. 9 meters aut, il pe mesira ca. 1,30 m x 1,40 m, ed el paisa ca. 9 tonnas. Las proximas emnas vegn anc il rest da la rundella arranschà, uschia ch'ella duai esser finida il december.

L'obelisc na stat dentant betg en il center da la rundella. Tenor la planisadra, l'architecta Caroline Gasser, duai la rundella esser in charta stilisada da la vischnanca da Glion. Vis da surengiu sajan visiblas las differentas vals enturn Glion e «La Guila» stettia simbolicamain per la citad da Glion.

Da surengiu è la rundella ina charta stilisada da la vischnanca da Glion, cun «La Guila» sco la citad Glion.
Legenda: Da surengiu è la rundella ina charta stilisada da la vischnanca da Glion, cun «La Guila» sco la citad Glion. Grafica curschellas+gasser