Siglir tar il cuntegn
Inhalt

Surselva La firma Degonda ha avunda lavur

Avant passa trais onns, il mars 2012, ha il pievel svizzer detg gea a l’iniziativa encunter abitaziuns secundaras. Quai ha gì consequenzas per intginas firmas, surtut en il sectur da construcziun auta. En Surselva èsi vegni construì pli paucas chasas d’ina famiglia.

In lavurer da la firma Degonda montescha fanestras novas
Legenda: In lavurer da la firma Degonda montescha fanestras novas RTR, H. Giger

La firma Degonda SA a Cumpadials ha gì buns temps fin uss. Suenter la votaziun d’abitaziuns secundaras haja quai dà in boom da bajegiar. Bleras firmas hajan vulì finir projects ch’eran sin rucca. Era cun la lavur dal 2015 saja el cuntent, di Clau Degonda, il schef da la Degonda SA.

Mender en l'avegnir

Mo en l’avegnir èsi da quintar che quai giaja mender. Il volumen vegnia pli pitschen ed il squitsch sin ils pretschs vegnia a crescher per las interpresas, surtut tar ils bajetgs novs, manegia el.

La firma Degonda datti dapi 1964. Ella è spezialisada en renovar e sanar bajetgs, vul dir ella bajegia fanestras novas ed era curtins d’enviern (dapi 1991). Mo quels èn il mument tschertgads damain, perquai ch’ins construescha chasas cun grondas fanestras, sco Clau Degonda ha ditg ad RTR.