Reto Gurtner ha fatg conscient ils impressaris, che la Svizra haja patì ils davos onns. Là nua che la Svizra saja stada pli baud sin l'emprim plaz – en la dumonda suenter il pass cotschen – saja ella tuttenina be pli sin l'otgavel plaz. Perfin il pass austriac saja pli dumandà, ha Gurtner menziunà.
Il mender saja dentant la rangaziun dals Svizzers, quai che appartegnia la curtaschia. Da tuttas tiaras mesiradas saja la Svizra sin il davos plaz.
Digitalisaziun totala
Reto Gurtner ha era fatg attent, che quai che schabegia uss en l'Arena Alva saja sco en in laboratori. Sch'in ha ina buna idea, vegn quella realisada; e sch'i funcziunescha betg, vegn ella puspè dismessa. La nova App «Inside Laax» saja en in svilup permanent. Las datas digitalas ch’el rimnia ed elaboreschia cun quella App sajan nundumbraivlas e fitg custaivlas per la reclama ed ils contacts cun la
clientella.
Gist las pendicularas hajan in grond manco, quai che appartegnia l'enconuschientscha da la clientella. En quest cas saja mintga scrinari u hotelier pli lunsch che las pendicularas. Cun la digitalisaziun sa midia quai dentant, ha manegià Gurtner.
RR actualitad 11:00