Siglir tar il cuntegn
cuntegn

Surselva La butia dal vitg a Siat resta averta

La cooperativa “stizun da vitg Siat” maina vinavant la butia en atgna reschia.

La butia dal vitg da Siat.
Legenda: La butia dal vitg da Siat. RTR, C. Albin

L’onn 2003 ha il Volg decidì da serrar la butia a Siat, perquai ch'ella na rendeva betg. Sin quai han convischins e possessurs da secundas abitaziuns fundà la cooperativa "stizun da vitg Siat", cun la finamira da mantegnair la butia. Els han cumprà la butia ed affittà ella ad ina persuna privata, che ha manà la butia sin agen quint.

La stad vargada ha quella persuna dentant desditg il contract sin fin november 2015. Cunquai che la cooperativa n’ha betg chattà ina successura ni in successur, ha ella decidì da sezza manar la butia. Per quai ha ella mess en duas persunas a temp parzial, che mainan la butia sco emploiads da la cooperativa.

Emil Efinger, il president da la cooperativa "Stizun dal vitg Siat".
Legenda: Emil Efinger, il president da la cooperativa "Stizun dal vitg Siat". RTR, C. Albin

Purschidas ed eveniments spezials

En maximal 3 onns sto la butia almain savair cuvrir ils custs. Sche quai na gartegia betg, vegni la cooperativa a serrar definitivamain la butia. Quai ha detg Emil Efinger, il president da la cooperativa. Per promover la butia èn planisadas acziuns spezialas ed era cooperaziuns cun purs da la regiun.