Siglir tar il cuntegn

Surselva La brocki a Trin-Mulin vegn stgarpada giu

La via chantunala atras Trin-Mulin duai vegnir schlargiada. Per far quai ston 3 chasas da vart sura da la via vegnir stgarpadas giu. En ina da quellas chasas sa chatta dapi pli che 7 onns la brocki da Markus Stocker.

Legende: Video La Brocki Mulin sto far plaz a la via abspielen. Laufzeit 2:32 Minuten.
Or da Actualitad video dals 15.08.2015.

Enfin entschatta settember ha Markus Stocker peda da rumir sia fatschenta. Ch'el stoppia bandunar in di questa chasa, cun quai ha el quintà. Gia avant 5 onns ha el cumenzà a tschertgar ina nova chasa per sia brocki. Chattà ha el ina chasa datiers da Tusaun, suenter il tunnel da la via chantunala en direcziun da Casti. Questà chasa è bajegiada, sco la chasa a Trin-Mulin, gest sper via.

Bler material

Dapi 7 onns e mez posseda Markus Stocker la brocki a Trin-Mulin. En quel temp ha el rimnà bler material. Cunzunt mobilias veglias da purs èn ses favurits. Quant material ch’el ha en tut, na sa el sez betg exact. Tut vul el dentant betg dischlocar. Perquai ha el gia dismess ina part dal material ed el ha cumenzà ina vendita a pretschs reducids. Uschia spera el da anc pudair vender ina part dal material.

Clients cunzunt da la Bassa e da la Germania

Ils clients da Markus Stocker vegnan cunzunt da la bassa e da la Germania. La gronda part èn giasts da vacanzas u possessurs d’abitaziuns secundaras en la regiun. Cunquai che sia brocki saja gist sper via, saja quai simpel da chattar el. Tut ils turists ed indigens stoppian gea charrar sper ses affar ora.

Chapientscha per il schlargiament da la via

Markus Stocker abitescha gia dapi pli che 13 onns a Trin-Mulin ed el enconuscha bain la situaziun. La via è en quel lieu uschè stretga, che dus chars u camiuns pon strusch cruschar. I saja fitg privlus ed era el haja gia gì cletg da betg vegnir sut in auto en. El n'haja era betg fatg opposiziun encunter la decisiun dal chantun da schlargiar la via chantunala a Trin-Mulin.