Siglir tar il cuntegn
Inhalt

Surselva «L’ospital regiunal Surselva dovra ils pazients indigens»

Quai di il cusseglier guvernativ e schef dal departament da giustia, segirezza e sanadad Christian Rathgeb. Senza quels na possia l’ospital betg mantegnair la purschida actuala.

Aurelio Casanova, Mathias Bundi, Christian Rathgeb e Marcus Caduff davant l'Ospital regiunal Surselva.
Legenda: Aurelio Casanova, Mathias Bundi, Christian Rathgeb e Marcus Caduff davant l'Ospital regiunal Surselva. RTR, Carlo Albin

Durant ina visita en l’ospital regiunal da la Surselva a Glion ha il schef dal departament da sanadad Christian Rathgeb constatà, che la purschida da l’ospital ha ina buna qualitad. Quella purschida possia dentant mo vegnir mantegnida, sch'i vegn collavurà entaifer la Surselva pli stretg cun auters acturs el sectur da sanadad. E cunzunt ils indigens stoppian duvrar la purschida da l’ospital e na betg ir ordaifer per laschar tractar malsognas.

Senza collavuraziun na vai betg

Per surmuntar ils problems da l’avegnir spera Christian Rathgeb, ch’ils differents acturs el sectur da sanadad sa cunvegnian p.ex. sin ina plattafurma d’informatica communabla ni da metter ensemen il management da persunal. L’ospital, las chasas d’attempads e da tgira, la Spitex ed auters puschiders da prestaziuns da sanadad en la Surselva han en quels secturs tenor Rathgeb in grond potenzial da spargnar. Senza talas collavuraziuns na vegni betg ad esser pussibel da finanziar en l’avegnir il sectur da sanadad.

RR actualitad 08:00