Siglir tar il cuntegn

Header

Video
Concurrenza da pizzaioli a Mustér
Or da Telesguard dals 23.11.2016.
abspielen
cuntegn

Surselva L’ingredienza la pli impurtanta per ina pizza è la passiun

Dus dis èn numerus pizzaioli a Mustér en la pizzaria dal 'Catrina Resort' per il 'Pizza Master Cup'. Ina concurrenza organisada da l'Unione Pizzaioli Tradizionali e Ristoratori - in'uniun da l'Italia che ha cunzunt la finamira da scolar pizzaioli.

Entant che l’emprim di è stà sut l'ensaina dal s’entupar e far pizzas per tgi che ha vulì, vegn sclerì il segund di, tgi che fa la meglra pizza.

Ils pizzaioli preschentan gugent lur lavur.
Legenda: Ils pizzaioli preschentan gugent lur lavur. RTR, G. Hosang

Amur per la lavur

Mintga pizzaiolo ha sco i para in secret u in tric per che sia pizza daventa buna ni schizunt la meglra. Tradir quel na vulan els dentant betg. Impurtantas sajan dentant er las ingredienzas. Quellas stoppian esser d’auta qualitad. Betg main impurtant è il temp che la pasta ha per levar. Pli bler temp ch’ins dettia a la pasta da levar e pli digeribla e meglra che la pizza vegnia, declera Antoni Trivento da San Severo (I). L’amur per la lavur dovri era per Claudio Vicanò, che ha procurà ch’il Pizza Master Cup è per l’emprima giada en Svizra.

I dovra passiun

Tenor la presidenta da la giuria dal Pizza Master Cup, Assunta Ferraro, è il secret da far ina buna pizza la passiun. In bun pizzaiolo stoppia amar da far la pizza. «Jau hai definì la pizza sco ina bella dunna. Pertge cura ch’ils pizzaioli elavureschan mintgamai la pasta da la pizza, fan els quai cun charezza» declera Assunta Ferraro.

Dapi var 40 onns è ella giurora tar talas concurrenzas ed ella sappia ch’ina pizza fatga cun charezzia gustia meglier. Cun tanta experientscha vesia ella gia ad egl vid la pizza sche quella saja buna, senza insumma stuair sagiar ella. Valità vegn la pasta, il gust, co la pizza è cotga e la tecnica co ella è fatga. Quai dat lura mintgamai 30 fin 100 puncts. Il pizzaiolo cun ils pli blers puncts gudogna la concurrenza.