L’hotel d‘appartaments Peaks Place a Laax è avert

Sper in restaurant (The Peaks da Manuel Reichenbach), ina bar, stanzas da conferenzas, in fumoir, in parcadi sutterran cun access direct a l'hotel, porscha il hotel er ina zona da wellness da 850 meters quadrats

Il Peaks Place a Laax.

Legenda da maletgs: Il Peaks Place a Laax. HRS Real Estate SA

Da las 102 abitaziuns da 1,5 enfin 4,5 stanzas èn 74 abitaziuns administradas e 28 abitaziuns secundaras. Ils pretschs da las abitaziuns varieschan tranter ca. 0,5 ed 1 milliuns francs.

Tut ils possessurs ni locaturs d’ina da las abitaziuns san profitar dal service e da la purschida dal hotel da 4*, dentant mo cun custs supplementars. En tut ha l’investur HRS Real Estate SA investì rodund 70 milliuns francs.

Abitaziuns secundaras anc da cumprar

Martin Kull, il president e possessur da HRS Real Estate SA.

Legenda da maletgs: Martin Kull, il president e possessur da HRS Real Estate SA. HRS Real Estate SA

Tenor il president e possessur da la HRS Real Estate SA, Martin Kull, èn pir circa la mesadad da las 28 abitaziuns secundaras vendidas.Ozendi saja i pli grev da vender talas abitaziuns. Ils clients veglian l’emprim vesair las abitaziuns finidas e forsa era passentar vacanzas sco locatur en ina da las abitaziuns, avant da cumprar ina. L’interess saja dentant dà e la finamira saja da vender tut las abitaziuns secundaras aifer ils proxims 2 onns.