L’art director dal film dal Gottard

Sper il reschissur e l’um da camera è l’art director ina persuna fitg impurtanta per in film. El è quel che fa pussibel l'impussibel.

Georg Bringolf, l'art director dal film.

Legenda da maletgs: Georg Bringolf, l'art director dal film, davant ina culissa a Valendau. RTR, C. Albin

Enfin la fin settember è Valendau ed il conturn da Glion anc il Hollywood da la Svizra. Pliras scenas per il film sur da la construcziun dal tunnel dal Gottard ston anc vegnir filmadas. Ina gronda producziun cun bleras persunas che lavuran davos las culissas. Ina da quellas persunas è l’art director Georg Bringolf.

Decoratur da tribuna per il film

Georg Bringolf ha 53 onns ed è da Turitg. Dapi prest 20 onns è el art director e dapi 8 onns docent en chaussa al la scola auta d'art a Turitg. Art director è tenor el in decoratur da tribuna per il film. Sia lavur è da crear in mund realistic per il film. El ha da tener en egl tut ils pitschens detagls e da procurar per in maletg dal film autentic.

Impussibel è nagut

En quella funcziun a el inqual giadas gì d’organisar chaussas impussiblas. Per il film dal Gottard a el per exempel stuì organisar cadavers da chavals. I dettia ina explosiun da dinamit durant in transport cun chavals. Quella explosiun na survivan betg tut ils chavals. Chattar cadavers è dentant simpel. Quels san ins retrair en in fundus en Germania.

La culpa da tut ils donns

Sper organisar da tuttas chaussas, è Georg Bringolf era la persuna da contact per las persunas che mettan a disposiziun objects ni entiras chasas per il film. D’ina vart è quai ina incumbensa fitg interessanta, da l’autra vart era malengraziaivla. El è l’emprim el lieu da filmar ed era il davos che banduna quel. Vul dir ch’el sto prender encunter tut las reclamaziuns pervia da donns che l’equipa da filmar a chaschunà. Donns, dals quals el na saja betg la culpa.