Siglir tar il cuntegn

Surselva L’art da tagliar pumera

Co ston ins tagliar endretg las plantas en curtin? Per sclerir questa dumonda ha il Center sursilvan d’agricultura organisà dacurt in curs. Las instrucziuns ha il pur da Sumvitg Sep Benedetg Candinas dà.

Sep Benedetg Candinas intruescha co tagliar.
Legenda: Sep Benedetg Candinas intruescha co tagliar plantas. RTR/H. Giger

Ins fetschia ina differenza tranter plantas giuvnas e plantas veglias. Tar plantas giuvnas stoppian ins far in “tagl d’educaziun”, declera Sep Benedetg. Quai vul dir: Ins ha in rom entamez e trais fin quatter roms laterals. Il rom entamez dastga esser pli lung, ils roms laterals duessan crescher en in anghel da 45 grads. Per evitar ch’in romin creschia stoppian ins tagliar giu tiers il rom e na betg laschar 1-2 centimeters. E l’onn proxim stoppian ins tagliar exact en il medem lieu. Ina pussaivladad da far ch’il rom na creschia betg pli saja da rumper giu el.

Avunda glisch

Ina planta duai la finala era avair ina furma. La curuna duess esser tagliada uschia che per exempel in mailer ha la furma dad in mail. Impurtant saja tar las plantas veglias ch’ellas hajan avunda glisch e ch’ellas portian buns fritgs. Ins po dentant era far sbagls da tagliar, per exempel sch’ins cumenza a tagliar dapertut. La finamira è da eleger tscherts romins e da laschar auters.

Avair pazienza

Sep Benedetg Candinas ha differentas plantas sin ses bain puril: maila, paira, palogas, primblas, apricosas, nectarinas, persics, nuschs e schizunt kiwis. El manegia ch’ins stoppia dentant avair pazienza fin in pumer creschia – quai possia cuzzar 10-15 onns.