Siglir tar il cuntegn
cuntegn

Surselva Istorgia da success: 15 onns bons a Mustér

Dapi 15 onns dat l’Uniun da commerci e professiun Mustér e contuorn (UCP) ora bons che pon vegnir duvrads tar ses commembers. Ina purschida che vegn appreziada tant da las fatschentas sco er da la populaziun.

Curdin Cajacob
Legenda: Curdin Cajacob, cassier da l'Uniun da commerci e professiun Mustér e contuorn. RTR, Gion Hosang

Per 25'000 fin 30’000 francs vegnan vendids mintg'onn bons da l’Uniun da commerci e professiun Mustér e contuorn (UCP). Sco il cassier e responsabel per ils bons Curdin Cajacob di, saja quella summa ils ultims onns constanta e quai mussia ch’ils bons sajan in success.

Quai che tira è palpiri

Avant intgins onns hajan ins fatg ponderaziuns da midar da bons da palpiri sin bons en furma d’ina carta da banca. Quella idea saja vegnida sbittada, declera Curdin Cajacob. Per l’ina vesia in bon da palpiri ora meglier per dar sco regal e per l’autra saja quai er pli bunmartgà.

Latiers vegnia, che mintga commember stuess avair la pussaivladad tecnica da prender encunter ils bons electronics.

Rimnar puncts per animar da cumprar tar il commerzi local

Ussa saja il tema dad ina carta puspè sin maisa. Quella na duai tenor Curdin Cajacob betg remplazzar ils bons. I duai dar in product supplementar. Ina carta per rimnar puncts sco quai ch’ils detaglists gronds han.

Tgi che cumpria en il commerzi local survegnia puncts ed ord quels dettia quai per exempel in rabat ubain la pussaivladad da cumprar insatge ch’ins po cumprar be cun quests puncts, di Curdin Cajacob. Ma quai saja uss anc be in'idea. I dovria anc bleras ponderaziuns e discussiuns fin ch’in tal product vegnia introducì, sche insumma.

RR actualitad 11:40

Ils bons da l'UCP

L’idea dals bons è, che las fatschentas indigenas vegnian resguardadas empè da far cumissiuns ordaifer. Uschia restian ils daners tar il commerzi local. Perquai vegnian ils bons er appreziads dals commembers da l’Uniun da commerci e professiun Mustér e contuorn UCP.