Siglir tar il cuntegn
Inhalt

Surselva Irun grisch - in privel per la populaziun da peschs en Surselva?

Ils pestgaders grischuns pestgan adina pli pauc. En Surselva per exempel èn vegnids pigliads l’onn 2016 var 11'500 peschs. Quai è bunamain in quart pli pauc che la media da var 15'000 peschs ils davos 10 onns. Tenor ils pestgaders èn tranter auter er ils iruns grischs (Graureiher) la culpa.

L'irun grisch.
Legenda: L'irun grisch. Roland Tomaschett

Dapi in per onns datti a Mustér ina colonia d’iruns grischs (Graureiher). Per blers pestgaders è quai in concurrent che maglia blers peschs, cunzunt ord pitschens flums e dutgs laterals.

Bruno Lombris
Legenda: Bruno Lombris mad

Quai ha er il pestgader passiunà Bruno Lombris constatà e decis da betg pli ir tant a pestga en talas auas e schanegiar uschia la populaziun da peschs.

El piglia er dapli peschs cun blessuras che pli baud. Quellas blessuras derivan dal bec da l’irun grisch e fan survegnir als peschs infecziuns da bulieus.

L'irun n'ha betg uschè gronda influenza

Tenor il survegliader da pestga da la Surselva, Roland Tomaschett, haja l’irun grisch bain in'influenza sin la populaziun da peschs – dentant betg ina uschè gronda sco pretendì d’intgins pestgaders.

Il chantun tegnia la situaziun en egl, acziuns spezialas encunter l’irun grisch na sajan dentant betg planisadas per il mument.

L’irun grisch saja in utschè protegì e quai restia era uschia.

Meglier per ils peschs: Dapli aua restanta e renaturalisaziuns

Pli impurtant è tenor Roland Tomaschett da schliar la problematica da l’aua restanta e da promover projects da renaturalisaziuns da flums.

Flums che mainan avunda aua e cun rivas natiralas porschian in meglier ambient als peschs e l’irun grisch haja pli grev da pigliar peschs en tals flums. Quai fiss pia ina schliaziun pli durabla ed effectiva che da cumbatter directamain l’irun grisch.

L'irun grisch.
Legenda: L'irun grisch. Roland Tomaschett

RR actualitad 07:10

L'irun grisch (Graureiher)

  • 90 - 98 cm grond
  • 155 - 195 cm avertura da las alas
  • 1 - 2 kg grev
  • maglia peschs, mieurs ed amfibias