Siglir tar il cuntegn
Inhalt

Surselva Inoltrà dumonda da bajegiar

Per la surbajegiada Sut Gliendas a Mustér che prevesa var 20 abitaziuns adattadas per seniors è vegnì inoltrà la dumonda da bajegiar

Visualisaziun da las chasas che vegnan bajegiadas a Sut Gliendas, sper la baselgia parochiala da Mustér.
Legenda: Visualisaziun da las chasas che vegnan bajegiadas a Sut Gliendas, sper la baselgia parochiala da Mustér. mad

Sco l’architect da la surbajegiada Aluis Huonder ha infurmà, saja vegnì fundà ina societad da bajegiar che realisescha la surbajegiada che prevesa trais chasas cun mintgamai 7 fin 8 abitaziuns adattadas per seniors. La societad che finanziescha la surbajegiada sin basa privata calculescha cun custs da 7 fin 8 milliuns.

Abitadi per giuven e vegl

Las abitaziuns vegnan construidas tenor las normas vertentas per abitaziuns ch’èn adattadas per viver en la vegliadetgna. Vul dir l’access ed il plaz per sutgas da rodas è dà en tut ils locals. L’idea da la societad è dentant ch’i dettia in maschaida tranter giuven e vegl. Fin in terz da las abitaziuns pon vegnir laschadas a tschains a persunas giuvnas.

Gia procurà per gronda discussiun

Il fatg ch’ina gruppa d’investiders privats realisescha abitaziuns per viver en la vegliadetgna a Mustér ha procurà per malaveglia tranter las vischnancas da Tujetsch e Mustér il schaner passà cura ch’il project è vegnì enconuschent. La fundaziun PUNTREIS a la quala las vischnancas da la Sursassiala fan part planisescha da realisar ina residenza da seniors a Sedrun. Il crap da stgarpitsch è stà che la vischnanca da Mustér metta a disposiziun il terren cun in contract da dretg da bajegiar.

Sche tut va bain quintan ins da pudair cumenzar cun las lavurs proxima stad e retrair las emprimas abitaziuns l’atun 2017.