La raschun pertge ch’ils purs han entschet a far giu las cornas da las vatgas èn las stallas libras. Avant 30 onns è quella nova furma da manaschis purils vegnida en moda. A l’entschatta è vegnì taglià davent las cornas a las vatgas creschidas, cun il temp è quai sa midà ed ils elevaturs han chattà in sistem da arder or las cornas gia als vadels. Quai vegn fatg ozendi cun dar ina dorma locala als vadels. Senza las cornas datti damain cumbats tranter las vatgas en las stallas libras.
Tge vul l’iniziativa?
I dastga vinavant vegnir ars ora las cornas tar vadels, di l'iniziant Armin Capaul. El è da l’opiniun, ch'ins stoppia dentant indemnisar auter il purs ch'èn pronts da laschar las cornas a las vatgas. Laschar las cornas vul numnadamain dir esser pronts da tegnair pli paucs animals sin il medem plaz. Ina stalla libra per vatgas cun cornas è circa in terz pli gronda.
Iniziativa ha gia in effect
Ils iniziants han ussa anc peda fin ils 23 da mars 2016 da rimnar las 100’000 suttascripziuns per questa iniziativa. Fin ussa en 91’875 suttascripziuns rimnadas. Sco quai che Mario Bühler, il cussegliader da purs da la Surselva ha constatà, haja quai gia dà ils davos onns ina midada en il patratgar dals purs. El ha manegià envers RTR ch'i dettia puspè dapli vatgas cun cornas che anc avant in pèr onns.
