Siglir tar il cuntegn

Surselva In telefon per quitads a Sedrun

1996 ha l’Alptransit Gottard SA cumenzà a bajegiar il tunnel da la Neat a Sedrun. Dapi lura datti in telefon per quitads.

«Ils abitants da Sedrun e conturn telefonavan surtut pervi da la canera e pervi da la pulvra», di Antonia Casutt che lavurava tar la societad d’inschigniers da la direcziun da construcziun. «Jau nudava num ed adressa da la persuna ch'aveva reclamà, e quella survegniva alura ina resposta.»

Els hajan adina empruvà da schliar ils problems, perquai ch’els sa chapivan bain cun la populaziun da Tujetsch e na vulevan betg periclitar quai, di Alfred Seiler, il responsabel per il sectur Sedrun tar l’Alptransit Gottard SA.

Reclamaziuns haja quai dà surtut ils emprims onns, e suenter pli e pli pauc. Il telefon per quitads è anc en funcziun, uss tar il biro d’inschigners Cavigelli a Glion. Sco Alfred Seiler di, stoppian els anc finir las lavurs ordaifer il tunnel, e quai duria probabel anc almain in fin in onn e mez.