Siglir tar il cuntegn

Surselva In salvader e ses salvà u la miracla da Rueun

Avant 15 onns era il maschinist Paolo Marques Rodrigues vegnì salvà ord la bova devastanta da Rueun. Ensemen cun ses salvader Michel Simmen sa regorda el a quels muments ed a sia vita suenter.

Legende: Video Paulo Marques Rodrigues: 15 onns suenter la bova da Rueun abspielen. Laufzeit 03:44 Minuten.
Or da Telesguard dals 15.11.2017.

Ils 16 da November 2002, pia avant 15 onns, en las bovas idas a val dapertut en la Surselva: A Schlans, Trun, Tersnaus e Rueun han ellas fatg grondas devastaziuns. A guardar ils purtrets da quella giada èsi strusch betg da s'imaginar, ch'igl n'ha dà nagins morts.

A Rueun eran vegnidas trais persunas en la bova e tuts trais eran maschinists ch'avevan gist cumenzà da rumir l’emprima bova cun lur baggers. Durant lur lavurs eran els vegnids surprais da la segunda bova.

L'istorgia anc betg raquintada

Qua entschaiva l'istorgia dal maschinist portugais Paolo Marques Rodrigues:

Fernanda e Paolo Rodrigues entamez Michel Simmen.
Legenda: Michel Simmen (entamez) sin visita tar Paolo e Fernada Rodrigues RTR, Linus Livers

El haja gì trais anghels protecturs: Dus requirents d’asil da l'Eritrea, ch'avevan vesì co ch'el era vegnì en la bova e Michel Simmen. Simmen lavurava en il center da requirents d’asil a Rueun ed era vegnì alarmà da quels dus requirents. Communablamain han els savì spendrar Paolo Marques Rodrigues.

Michel Simmen mussa a Martin Valär con aut che la boda era.
Legenda: Michel Simmen e Martin Valär sin il plaz nua che Paolo Marques Rodrigues era en la boda. RTR, Linus Livers

L'emprim mument han els pensà che l'um saja mort. Pir cur che Michel Simmen haja deliberà la bucca da Paolo Marques Rodrigues da pitschens craps e glera haja el cumenzà a tusser.

Tuttafatg n'è el mai sa revegnì da quest accident. Anc oz na sa el betg lavurar.

Salvavita

Fin avant intginas emnas aveva Paolo Marques Rodrigues quasi emblidà, che Michel Simmen aveva salvà la vita ad el. Lura èn els s’entupads casualmain. Ord da quella emprima sentupada ha igl dà la finala er ina secunda, nua che RTR ha pudì accumpagnar els.





Ord l'archiv

RR actualitad 08:00