Siglir tar il cuntegn
cuntegn

Surselva In rempar per 3 milliuns francs

L’ual en la Val Acletta po vegnir cun bovas e chaschunar inundaziuns e gronds donns. Perquai vul la vischnanca da Mustér sanar il rempar ; e quai fin a la via chantunala.

Il rempar a la staziun a val da las pendicularas.
Legenda: Il rempar a la staziun a val da las pendicularas. RTR, H. Giger
Il rempar vers la via chantunala.
Legenda: Il rempar vers la via chantunala. RTR, H. Giger

Il president communal Francestg Cajacob conceda ch’il Resort Catrina profiteschia da questa sanaziun. Mo baud ni tard saja ella necessaria.
En il messadi al cussegl da vischnanca propona la suprastanza da concert in credit da planisaziun da 160'000 francs. Alura hajan els ils detagls dil project cun custs e las mesiras. Silsuenter possia la populaziun decider. Tenor las emprimas calculaziuns èsi da quintar cun custs da ca. 3 milliuns francs. Daners da chantun e confederaziun na dettia quai betg, di Francestg Cajacob.

Mustér investescha 4 milliuns francs

En il messadi dat la suprastanza era ina survista dal Resort Catrina. Markus Weber preveda d’investir 90 milliuns francs (60 en il resort, 15 per la pendiculara Parlet-Sedrun, 10 per il project d’ennavar e 5 en la gastronomia). La cumpart da la vischnanca per il project d’ennavar fa 3 milliuns e per la pendiculara Parlet-Sedrun dat ella 2,5 milliuns sco emprest e 2,5 milliuns sco garanzia d’emprest envers il chantun. Plinavant datti 2 milliuns taxas da colliaziun per il resort ; e sut il stritg sto la vischnanca investir 4 milliuns francs.
Quest project augmentia il svilup en vischnanca e perquai saja la cumpart da la vischnanca da responsar, di il president communal da Mustér.