Siglir tar il cuntegn

Header

cuntegn

Surselva In moderatur duai intermediar tar Sedrun Mustér turissem

Co vinavant cun Sedrun Mustér Turissem? Questa dumonda è stada en il center d’in discurs ier saira tranter la suprastanza da Tujetsch ed il chantun.

I saja stà bun ch’ins haja mess ils fatgs sin maisa, di Eugen Arpagaus da l’uffizi d’economia e da turissem. Impurtant saja d’integrar megliers las pendicularas da Mustér e da Andermatt-Sedrun en ils discurs. La finala duessan ellas survegnir 48 milliuns francs da chantun e confederaziun.

Per chattar in consens tar Sedrun Mustér Turissem vulan ins engaschar in moderatur.

Discurs constructiv

Il discurs saja stà constructiv, quai ha era il president communal da Tujetsch Beat Roeschlin confermà. El haja emprendì bler ed el chapeschia ed acceptia las pretensiuns dil chantun, vul dir che las duas vischnancas da Tujetsch e Mustér stoppian collavurar entaifer Sedrun Mustér Turissem.

Collavurar vinavant

Il president communal da Mustér Francestg Cajacob ed era il president da Sedrun Mustér Turissem Curdin Brugger speran che las duas vischnancas collavurian vinavant. Brugger beneventa l'idea dal chantun d'engaschar in intermediatur. L'entschatta da november duessan ils pertutgads elavurar in sboz per ina cunvegna da prestaziun. Ils contracts tranter Sedrun Mustér Turissem e Grischun vacanzas restan en vigur, ha Cajacob ditg ad RTR.

Artitgels legids il pli savens