Siglir tar il cuntegn
cuntegn

Surselva In film modern rumantsch

Actualmain vegn filmà tranter Glion e Trin il film «Amur senza fin». I na sa tracta betg d’in film che mussa la Surselva sco en in museum. I sa tracta d’in fil modern rumantsch.

Legenda: Guardar il video «Amur senza fin» – ina cumedia d'amur filmada a Trin. Durada 03:24 minutas.
Or da Telesguard dals 22.09.2017.

Per in film rumantsch dovri era acturs rumantschs. Uschia fan per exempel René Schnoz da Mustér e Bruno Cathomas da Laax part da quest film.

René Schnoz, actur
Legenda: René Schnoz, actur RTR, Gion Hosang

«Jau ma legrel natiralmain. La cuntrada qua è praticamain mia patria» declera René Schnoz. S’endisar sto el vid sia rolla. El ha da giugar ina persuna pli veglia che quai ch’el è. Il Silvio ch’el ha da giugar è president da l’uniun da chatscha e president da la plaiv. «Jau sun bain reschissur, ma president sun jau anc mai stà insanua» e perquai haja el segir da lavurar in pau vid quai.

Bruno Cathomas, actur
Legenda: Bruno Cathomas, actur RTR, Gion Hosang

Bruno Cathomas gioga la rolla principala. Per el èsi nunusità da giugar en in film per rumantsch. «Jau stoi ussa puspè emprender da discurrer rumantsch» manegia el. La rolla ch’el ha da giugar saja dentant sco scritta per el, quai giaja tgunsch. El fetschia era gugent gieus, haja gugent l'amur e giaudia gugent la vita, in pau sco il Gieri en il film.

Cumedia da relaziun

Il Gieri ei maridà dapi 20 onns. Mo sia lètg ha dentant fatg in pau ruina ed uschia sa lascha sia dunna inspirar dal nov augsegner da l'India che dat bain inqual cussegl nunortodox co dar nov schlantsch a lur lètg. Ma Gieri ha in'affera cun la meglra amia da sia dunna e questa vegn sa chapescha a la glisch.

Christoph Schaub, reschissur
Legenda: Christoph Schaub, reschissur RTR, Gion Hosang

«Nus vulain far in film modern rumantsch» declera Bruno Cathomas. Il reschissur Christoph Schaub (tranter auter Sternenberg e Giulias Verschwinden) manegia ch’ins pudessi far quest film en tge lingua ch’ins veglia. L’istorgia saja buna e pudessi capitar dapertut uschia.

Il film vegn a custar rodund 1,9 milliuns. Quai è en il rom dals films che la televisiun svizra lascha producir. Il film che dura var 90 minutas vegn lura era emess l’atun 2018, ina sonda saira sin il chanal dad SRF.

RR actualitad 12:00