In directur da Sedrun Mustér Turissem en plazza cumplaina?

Il directur da Sedrun Mustér Turissem (SMT) lavura il mument en plazza parziala. Quai duai sa midar, sch'i va tenor il president communal da Tujetsch Beat Roeschlin vul ch’el lavuria en l’avegnir 100 pertschient.

Biro da Sedrun Mustér turissem a Sedrun.

Legenda da maletgs: Biro da Sedrun Mustér turissem a Sedrun. RTR, H. Giger

Quest giavisch ha el exprimì a l’ultima sesida dal cussegl da vischnanca. En vista a las grondas sfidas dovria quai in directur en plazza cumplaina. SMT duai esser ina ferma organisaziun turistica cun ina vasta purschida da prestaziuns. Proximamain stoppian els elavurar ina cunvegna da prestaziun e reglar l’organisaziun, la finanziaziun e la furma giuridica.

Fixar in profil

Il president communal da Mustér Francestg Cajacob fa valair che SMT stoppia elavurar l’emprim la cunvegna da prestaziun. E la finala stoppian els era fixar il profil dal directur. Pir alura possian ins decider, con pertschient ch’el lavuria.

Analisar la situaziun

Il president da SMT Curdin Brugger di che quai saja in tema en suprastanza, cura che la cunvegna da prestaziun saja sin maisa. Alura possian els analisar la situaziun, sch’i dovria ina plazza da 100 pertschient. Mo forsa dettia quai era la varianta da reparter la lavur cun ina persuna en biro.
En scadin cas restia il marketing vinavant tar Grischun Vacanzas. Els hajan fatg bunas experientschas cun quest’organisaziun turistica e veglian bajegiar si insatge a lunga vista.