Siglir tar il cuntegn
Inhalt

Surselva In communicatur indigen per il parc da vent Lumnezia

Ina persuna indigena che discurra rumantsch, duai propagar il project tar ils indigens.

Rodas da vent sur Lumbrein (illustraziun).
Legenda: Rodas da vent sur Lumbrein (illustraziun). mad

La Parc da vent Lumnezia SA tschertga in «communicatur», ina persuna indigena che discurra rumantsch, per promover il project. L’incumbensa principala è da coordinar l’examinaziun ecologica dal project cun ils differents uffizis dal chantun. Plinavant duai quai communicatur era propagar il project tar la populaziun indigena.

Persuna enconuschenta

Tenor il president dal cussegl d’administraziun da la Parc da vent Lumnezia SA, Guido Schönenberger, è il candidat ideal ina persuna enconuschenta da lingua rumantscha che viva en la regiun. Ella stoppia enconuscher bain la regiun ed era avair ina idea da rodas da vent e da la producziun d’energia cun la forza dal vent. Ina part impurtanta da la lavur dal communicatur saja numnadamain il contact cun la populaziun indigena; discussiunar sur dal project, dumandar suenter pensiers, propagar il project ed empruvar da persvader ils indigens dals avantatgs dal project.

Votaziun gia 2018?

Tut quai schabegia en vista d’ina pussaivla votaziun sur da la midada dal plan da zonas necessaria per pudair realisar quai project. La finamira dal president dal cussegl d’administraziun da la Parc da vent Surselva SA Guido Schönenberger è, da pudair laschar votar la populaziun gia il 2018. Sche quai gartegia n’è dentant anc betg cler. L’emprim sto l’examinaziun ecologica vegnir fatga e mussar, ch’il project è realisabel tenor las leschas vertentas per la protecziun da l’ambient.