Siglir tar il cuntegn
cuntegn

Surselva In bus cursescha la saira tranter Mustér ed Andermatt

La stad datti nov ina colliaziun supplementara dal traffic public cun in bus: Partenza è las 20:22 davent da Mustér e las 21:24 davent dad Andermatt. Questa purschida vala davent dal prim da matg fin ils 31 d’october.

Bus da la firma da transports Schmid.
Legenda: Bus da la firma da transports Schmid. Daniel Schmid

Il chantun, la vischnanca da Tujetsch e Sedrun Mustér Turissem hajan giavischà questa colliaziun, di il pledader da medias da la Viafier Matterhorn Gotthard Jan Bärwalde. Perquai hajan els tschertgà ina schliaziun e contactà la firma da transports Schmid a Sedrun, ina firma che fa gia viadis per remplazzar la viafier.

Daniel Schmid di che quai dettia la stad in pau dapli lavur, mo i saja era ina stupenta purschida perquai che la Surselva vegnia colliada cun la Svizra centrala, e là vesa el l’avantatg. Ses bus ha plaz per 16 persunas.

Gia uss fa Daniel Schmid servetschs per la Viafier Matterhorn Gotthard
Legenda: Gia uss fa Daniel Schmid servetschs per la Viafier Matterhorn Gotthard Daniel Schmid

Era Werner Glünkin da l’Uffizi da traffic dal Grischun di, ch’els hajan giavischà questa purschida.

Fin l’entschatta da matg parta l’ultim tren da Mustér a Andermatt mintgamai a las 18.14 e l’ultim tren dad Andermatt a Mustér da las 18.28. Davent dal matg fin la fin d'october vegn il bus supplementar a cursar mintgamai a las 20:22 davent Mustér en direcziun Andermatt ed a las 21:24 davent dad Andermatt en direcziun Mustér.

RR actualitad 11:00