Siglir tar il cuntegn
Inhalt

Surselva Ils Tuatschins han stuì spetgar ditg sin la halla polivalenta

Sonda passada è la nova halla sin il plaz Dulezi a Sedrun vegnida inaugurada. Ella ha custà circa 7 milliuns francs. 2014 aveva il pievel approvà il credit per la halla, l’avrigl 2016 era stada l’emprima badigliada.

Ils emprims plans per bajegiar ina tala halla datti gia 1972, sco il president da la cumissiun da bajegiar André Schmid di.Las uniuns hajan adina cumbattì ed empruvà da motivar ils politichers; ed uschè sajan pliras cumissiuns sa fatschentadas cun in project. I deva perfin ideas da construir ina halla traidubla e dubla. Mo la finala sajan els sa decidids per questa varianta simpla e modesta.

In center da sport

Era il suprastant Renato Decurtins che tgira il departament da sport e cultura conceda ch’ins haja stuì spetgar ditg. La halla polivalenta cumpletteschia ils plazs da ballape, da tennis e da glatsch. Uss possian ins discurrer dad in center da sport sin il plaz Dulezi. Ins haja las localitads necessarias cun duschas: Quai ch’els avevan fin uss eri vairamain miserabel, di Decurtins.

Era per las scolas

La halla nova duai dentant surtut era servir a scolaras e scolars, sco l’anteriur scolast Beni Hendry manegia. La halla da gimnastica veglia na satisfascheva betg a las pretensiuns modernas, gnanc da la grondezza. Il lieu da la halla nova saja ideal perquai ch’i na saja betg lunsch davent da la scola.

Sinergias cun il CSC a Mustér?

En connex cun il project ha era dà critica, perquai che Mustér haja in grond center da sport e cultura. La dumonda era, sch’ins na possia betg nizzegiar sinergias e schizunt desister da la halla nova a Sedrun. Il president da la cumissiun da bajegiar di che cura ch’el vegniva confruntà cun questa renfatscha scheva el adina che uschè ditg che Vrin haja ina meglierà infrastructura na saja quai betg in luxus che Tujetsch dastga avair ina infrastructura adequata al temp.

Rait da anergia furnescha l'energia

Ils plans per la halla polivalenta a Sedrun ha il biro d’architectura Vincenz e Weishaupt SA a Glion fatg. I dat ina halla da gimnastica, ina sala da s’entupar, locals per deponer material ed urden da sport, ina pitschna cuschina, gardarobas e duschas etc. Suten è il local cun la rait da anergia da l’energia alpina, l’indriz che furnescha l’energia.

RR actualitad 07:00