Ils Furbaz fan ina pausa creativa

Suenter la seria da concerts da Nadal 2016 vulan ils Furbaz ponderar l’avegnir da la gruppa e far ina pausa creativa d’in onn.

Ils Furbaz: Marie Louise Werth cun (da san) Giusep Quinter, Gion Andrea Casanova ed Ursin Defuns.

Legenda da maletgs: Ils Furbaz: Marie Louise Werth cun (da san) Giusep Quinter, Gion Andrea Casanova ed Ursin Defuns. mad

Dapi il return l’onn 2004 è la gruppa Ils Furbaz puspè presenta sin las tribunas Svizras, e quai cunzunt cun concerts durant il temp da Nadal. La furmaziun actuala cun Marie Luise Werth, Giusep Quinter, Gion Andrea Casanova ed Ursin Defuns ha era quest onn puspè dà il november e december ina seria da 13 concerts en l'entira Svizra tudestga. Tenor Ursin Defuns è quai dentant stà, per il mument, la davosa seria da concerts da Nadal.

Almain 1 onn vegnan ils Furbaz betg pli a dar concerts. Pausa creativa.

Legenda da maletgs: Almain in onn vegnan ils Furbaz betg pli a dar concerts. Pausa creativa. mad

Pausa creativa

Sco mintg’onn ils davos 13 onns han ils Furbaz planisà ina turnea da Nadal d’in mais. Per Ursin Defuns è quai stà la dretga schliaziun. Uschia hajan els savì sa concentrar durant l’onn sin lur professiuns e giudair durant in mais lur hobi, il chantar.

Ils Furbaz na vulan betg daventar ina gruppa professiunala, las ristgas finanzialas d’ina vita sco musicist na sajan els betg pronts da purtar. Quai na vegnia era betg a sa midar. La gruppa veglia dentant far ina pausa per mirar tge focus ch’ella veglia metter en l’avegnir.

3 plattas d'aur han ils Furbaz gudagnà en lur carriera.

Legenda da maletgs: Trais plattas d'aur han ils Furbaz gudagnà en lur carriera. mad

Averts per novs impuls

Tge focus che quai pudess esser suenter la pausa creativa lai Ursin Defuns avert. Era il tema Nadal na saja betg sacrosanct. Uschia pudessan ils Furbaz midar sin ina seria da concerts per exempel la primavaira ni forsa sa participar a festivals. Era ina participaziun a l’Eurovision Song Contest pudess puspè daventar in tema.