Siglir tar il cuntegn

Header

cuntegn

Surselva Il sviament vegn avert - la citad da Glion sto anc s’adattar

Mesemna ils 10 d'avust avra il sviament da Glion. Suenter trais onns bajegiar èsi uschè lunsch. Il chantun ha investì var 26 milliuns francs, vidlonder vegn anc var quatter milliuns che la vischnanca da Glion ha da surpigliar.

audio
Bunura: Glion reglescha auter il traffic pervi da la guntgida
ord Actualitad dals 03.08.2016.
laschar ir. Durada: 2 minutas 34 Secundas.

Las midadas en la citad da Glion n'èn betg anc prontas

En la citad sezza èn las midadas giavischadas ussa en l’emprima fasa, vul dir ellas èn publitgadas en il Fegl uffizial da la Surselva. La pli marcanta midada che duess vegnir è il quartier da Sontga Clau da la vart sanestra dal Rain. Quel duai vegnir serrà per il traffic grev. Sco quai che Aurelio Casanova, il president da vischnanca da Glion, ha ditg ad RTR haja il sviament da procurar per pli pauc traffic en ils quartiers ed uschia duess quai vegnir introducì.

Da nov precedenza da dretg

La cruschada Arcada, che maina en quest quartier da Sontga Clau, vegn puspè a daventar ina cruschada nua che la precedenza da dretg vala. La pli marcanta midada en la citad, che tutga era tar il sviament da Glion, è la cruschada tranter il hotel Raetia e la stizun d’uras Caveng. La survegnan quels che charreschan da la via Giessli en direcziun Castrisch la precedenza. Quai munta ch’ils automobilists che vegnan sur la punt per vegnir en il center n'han betg pli la precedenza. Questas midadas vegnan dentant introducidas pass per pass. Sch’i avess da dar protestas encunter questas mesiras pudess tut anc sa retardar.

Rundellas vegnan anc decoradas

Il sviament sco tal è finì, anc betg finidas èn las duas rundellas. Vul dir la decoraziun da las rundellas. Quai succeda pir en ina segunda fasa. Per la rundella da la vart da la Lumnezia èsi gia definì, che la guglia da crap ch’è ussa dasper via principala da l'autra vart dal Rain vegn spustada en questa rundella. La rundella principala da vart sanestra dal Rain pudess anc cuzzar in zic perquai che la vischnanca n’ha anc betg decidì exact la procedura. L'avertura dal sviament da Glion è in act festiv ch’entschaiva mesemna, ils 10 d'avust da las 10:00 uras. A las 12 vegn ella surdada al traffic.

video
Il sviament planisà - or da l'archiv Telesguard dals 05.09.2011
Or da RTR dals 02.08.2016.
laschar ir. Durada: 3 minutas 56 Secundas.

Artitgels legids il pli savens