Siglir tar il cuntegn
Inhalt

Surselva «Il pli grond sbagl è da pensar ch’i na capita nagut»

L'Associaziun da possessurs da chasas da la Surselva ha laschà infurmar da la polizia chantunala co ch'ins po segirar las chasas encunter enguladitschs.

Purtret da Theo Wasescha
Legenda: Theo Wasescha da la polizia chantunala, ha avertir ils possessurs da chasas d'esser attents. RTR, Linus Livers

I dettia in pèr impurtants puncts che valian sco reglas fundamentalas, uschia ha Theo Wasescha dal post da prevenziun da la polizia chantunala ditg en ses referat. Ins stoppia adina sa dumandar co ch'ins sez sa cuntegnia: «Serri'jau adina l'isch chasa cun la clav? En tut las fanestras serradas?»

Il lader entra adina là nua ch'igl è il pli simpel.
Autur: Theo WaseschaPost da prevenziun polizia chantunala

La regla ditgia numnadamain ch'il lader entria là nua ch'igl è il pli simpel. «Laders na vulan betg lavura bler.», uschia Wasescha. Lura dettia las pussaivladads tecnicas cun fanestras ed ischs ch'ins na possia betg auzar ora. Tut las pussaivladads cun cameras ed alarms u era cun glisch da schoc tutgan era tar las chaussas tecnicas. Quai vegn tenor Wasescha dentant strusch en dumonda tar ina chasa normala.

Ina sala cun trais retschas da maisas e varga 200 persunas.
Legenda: Ils possessurs da chasas da la Surselva èn s’infurmads davart enguladitschs. RTR, Linus Livers

Il pli impurtant saja ch'il possessur d’ina chasa fetschia sez inqual patratg co proteger la chasa. Per agid professiunal possian ins adina contactar il post da prevenziun tar la polizia.

L'organisaziun dals possessurs da chasas Surselva dumbra passa 1700 commembers. Da quels eran var 200 retschents a la radunanza generala ad Uors/ Suraua.

RR actualitad 12:00