Siglir tar il cuntegn
Inhalt

Surselva Il pass dal Lucmagn è stà serrà dapli dis che usità

Igl è stà in enviern senza accidents. Quai è il facit positiv ch’il president da la Pro Lucmagn Peter Binz fa. Mo i dat era l’autra vart da la medaglia: Il pass dal Lucmagn è stà serrà 57 dis (la media è 37 dis) ed avert 124 dis.

Ina lavina è vegnida nauagiu sin la via dal pass dal Lucmagn.
Legenda: Ina lavina è vegnida nauagiu sin la via dal pass dal Lucmagn. Otti Flepp

I dat plirs motivs persuenter ch’il pass è stà serrà blers dis. L’aura ha varià, vul dir cura ch’i era bell’aura en il nord era quai trid’aura en il sid. Il privel da lavinas è stà considerabel durant 84 dis, passà 20 dapli che durant l’enviern 2013/14. E la finala han ils collavuraturs da la Pro Lucmagn gì da cumbatter cun glatsch en la galaria sin il pass dal Lucmagn.

Nagin nov concept da segirtad

Malgrà la critica ch’il pass è stà serrà uschè bler, na veglia la Pro Lucmagn betg midar il concept da segirtad di Peter Binz. El spera dentant che las regenzas dal Tessin e dal Grischun prendian mesiras per tegnair avert dapli il pass dal Lucmagn. Saja quai cun prolungar la galaria dal pass da la vart nord ubain cun siglientar lavinas en il sid. Dacurt han era deputadas e deputads en il Cussegl grond pretendì che la regenza grischuna prendia mesiras per meglierar la situaziun dal pass l’enviern.