Siglir tar il cuntegn
Inhalt

Surselva Il nov president da Grischun Vacanzas sin visita en Surselva

Dapi entschatta october è Jürg Schmid il nov president da Grischun Vacanzas. L’emprim ch'el fa en quella funcziun è ina tura tras il Grischun. Sin questa tura visita el tut las organisaziuns da turissem en las regiuns, quai per survegnir ina survista tge che marscha bain e nua ch'i smatga.

La costa nord da la Surselva cun ils vitgs Laax, Falera, Sagogn, Schluein, Ruschein, Ladir, Siat e Breil.
Legenda: La costa nord da la Surselva cun ils vitgs Laax, Falera, Sagogn, Schluein, Ruschein, Ladir, Siat e Breil. RTR, N. Cadonau

Sin basa da quests discurs cun las differentas organisaziuns da turissem vul Jürg Schmid lura elavurar ideas co promover il turissem. Avant che dar respostas stoppia el pudair tschentar dumondas e discurrer cun ils responsabels, uschia Jürg Schmid. In terz dal viadi ha el gia fatg, actual è el stà en la Surselva.

La tgina dal Rain è unica

La Surselva disponia, sco era autras regiuns dal Grischun, d’ina natira intacta che vegnia era tschertgada da turists. Unic en Surselva saja dentant il Rain Anteriur, meglier detg la funtauna dal Rain. Sch’ins patratgia quants milliuns persunas che vivian a las rivas dal Rain e che hajan forsa il giavisch da vesair ina giada danunder che l’aua dal Rain vegnia, saja quai ina istorgia che stoppia vegnir raquintada anc pli savens.

Finanzas e collavuraziuns

Ils problems da la Surselva sajan ils medems sco era en autras regiuns dal Grischun. Interpresas turisticas sajan strusch pli profitablas, quai pervia dals pretschs bass da la concurrenza internaziunala, ed uschia n'hajan ellas era betg daners per investir e modernisar l’infrastructura.

Jürg Schmid (san.) e Martin Vincenz han visità las organisaziuns da turissem da la Surselva.
Legenda: Jürg Schmid (san.) e Martin Vincenz han visità las organisaziuns da turissem da la Surselva. RTR, C. Albin

Plinavant stoppian las destinaziuns collavurar dapli. Sin la fiera internaziunala sajan las destinaziuns che valan per il Grischun sco destinaziuns grondas, mo destinaziuns mesaunas ni pitschnas. Entras collavuraziuns possian ellas dentant augmentar lur influenza.

100 dis peda

En detagl vul Jürg Schmid dentant anc betg ir. Avant ch'annunziar mesiras e priorisar temas vul el l’emprim terminar ses viadi tras il Grischun e discurrer cun tut ils partenaris. Pir suenter 100 dis en sia nova funcziun sco president da Grischun Vacanzas saja el pront da discurrer sur da quellas chaussas.

RR actualitad 07:00