Cunzunt tar in grond manaschi da scola, sco quel da la vischnanca Glion, na saja quai betg pussaivel da far durant l’entira stad vacanzas, declera Silvio Dietrich. El è schef da 90 persunas d’instrucziun che dattan scola en sis lieus a var 500 scolaras e scolars. I dettia bain la pussaivladad da reducir il dumber da sururas durant la stad. Ma uschiglio saja quai da liquidar las pendenzas che sajan stadas enavos da l’onn da scola passà.
Mainascola è ina clamada nua ch’igl è da reagir exact cura ch’i capità insatge e quai ch’ins na vegn persuenter betg da far ston ins laschar fin ch’ins ha temp.
Temp ha el lura la stad cura che nagin auter ch’el e las secretarias èn en scola.
Temp per sa profundar
I saja dentant era da preparar tut per il proxim onn da scola. Uschia per exempel pon las structuras dal di vegnir organisadas en il detagl pir durant la stad. Pertge las annunzias per in tal basegn vegnan pir ussa rimnadas. Il temp da stad giauda Silvio Dietrich era. Quai saja il temp nua ch’el possia era sa profundar en temas, nua ch’ins possia sviluppar ideas e strategias.
RR actualitad 08:00