Siglir tar il cuntegn

Surselva Il lai da fermada Zervreila dastga vegnir pestgà vid

Per il lai da fermada da Zervreila vala a partir dal prim da matg novas prescripziuns pertutgant la pestga. Uschia na datti naginas limitas pli tar il dumber, la sort e la lunghezza dals peschs che dastgan vegnir pestgads. Quai pervi ch’il lai da Zervreila sto vegnir sanà ils proxims onns.

Il lai da Zevreila.
Legenda: Il lai da Zervreila vegn sanaus. Uss ston tut ils peschs ora. RTR, S. Derungs

Las reglas normalas da pestga na valan questa stagiun betg per il lai da fermada Zervreila entadim il vitg da Val Son Pieder. Sco quai ch'il Departament chantunal da construcziun, traffic e selvicultura scriva sajan questas mesiras necessarias per far in diever effizient dal dumber da peschs e per reducir quel.

Uschia astgan er dapli che sis peschs vegnids pestgads per di ed er tar las spezias che dastgan vegnir pestgadas na datti naginas limitas. Er la lunghezza dals peschs na gioga nagina rolla questa stagiun.

2’000 enfin 3’000 peschs

Tenor Marcel Michel da l’uffizi da chatscha e pestga èn vegnids pestgads ils davos onns en media enturn 1’500 peschs per onn.

I dettia dentant segir bler dapli peschs en il lai, surtut litgivas, salmelins da lai e salmelins canadais (namaycusch). Senza las limitas da lunghezza e da quantitad quinta Michel dentant cun 2'000 fin 3'000 peschs pigliads. El spera che blers pestgaders da l'entir chantun giajan a pestgar el lai da Zervreila, era sche il lai saja plitost lunsch davent.

RR novitads 11:00